ठाणे महापालिका कार्यक्षेत्रात प्रदुषण नियंत्रणाबाबत करण्यात येणाऱ्या उपाययोजनांचा अध्यक्षांनी घेतला आढावा
ठाणे (18) : शहरातील पर्यावरण संवर्धन, प्रदुषण नियंत्रण, एकल वापर प्लॅस्टिक वस्तू, याचबरोबर रहिवासी संकुलातील सांडपाण्याचा पुर्नवापर आदी बाबींसाठी ठाणे महापालिका प्रयत्नशील आहे. ठाणे हे स्वच्छ, हरित शहर आहेच परंतु ठाणे महापालिका राबवित असलेल्या उपक्रमांमध्ये प्रत्येक नागरिकांनी 100 टक्के सहभाग दिला तर पुढच्या पिढीला आणखीन पर्यावरणभिमुख असे ठाणे शहर अनुभवयाला मिळेल असे मत महाराष्ट्र प्रदुषण नियंत्रण मंडळाचे अध्यक्ष सिध्देश कदम यांनी आज ठाणे महापालिकेत व्यक्त केले.
महाराष्ट्र प्रदुषण नियंत्रण मंडळाचे अध्यक्ष सिध्देश कदम यांच्या अध्यक्षतेखाली झालेल्या बैठकीस महापालिका आयुक्त सौरभ राव, अतिरिक्त आयुक्त 2 प्रशांत रोडे, नगर अभियंता प्रशांत रोडे, पर्यावरण विभागाच्या मुख्य पर्यावरण अधिकारी मनिषा प्रधान, आरोग्य अधिकारी डॉ. राणी शिंदे यांच्यासह विविध विभागांचे अधिकारी उपस्थित होते.
यावेळी घनकचरा व्यवस्थापन विभाग, मलनिस्सारण विभाग, प्रदुषण नियंत्रण विभाग, पशुवैद्यकीय विभाग राबवित असलेल्या उपक्रमाचे सादरीकरण प्रशासनाकडून करण्यात आले.
ठाणे किंवा कोणत्याही शहरात होणारे प्रदुषण हे त्या शहरापुरतीच मर्यादित राहत नाही तर त्याचा परिणाम संपूर्ण राज्याला, देशाला होत असतो म्हणून प्रत्येकांनी आपापल्या घरातील प्रदुषण कसे नियंत्रणात राहील या संदर्भात प्रत्येक शहराने इतरांसोबत देवाणघेवाण करणे खूप गरजेचे आहे. शहरात बांधकाम चालू असलेल्या इमारतींमुळे प्रदुषण होवू नये यासाठी रेडी मिक्स प्लांटला आच्छादन करणे, रेडी मिक्स वाहतुकीसाठी वापरण्यात येणाऱ्या वाहनांचे टायर धुणे अशा विविध बाबी संदर्भात महाराष्ट्र प्रदुषण नियंत्रण मंडळाने यापूर्वीच महापालिकेला निर्देश दिले असून त्याची अंमलबजावणी होत असून ती अधिक प्रभावीपणे होणे गरजेचे असल्याचे अध्यक्षांनी नमूद केले.
शहरात येणाऱ्या मोठ्या वाहनांचे टायर हे शहराच्या प्रवेशद्वारावरच धुतले गेले तर त्या टायरमधून शहरात होणारे धुळीचे प्रमाण कमी होईल व त्या माध्यमातून रस्त्यावरची धूळ नियंत्रणात येईल असेही त्यांनी नमूद केले. तसेच नागरिक देखील जास्तीत जास्त प्रमाणात सार्वजनिक वाहनांचा वापर कसा करतील यासाठी ॲक्शन प्लॅन तयार करण्याच्या सूचना अध्यक्षांनी या बैठकीत दिल्या.
धुळ प्रदूषण नियंत्रित करण्यासाठी महाराष्ट्र प्रदुषण नियंत्रण मंडळाने निश्चित केलेली नवीन मार्गदर्शक तत्पवे सर्व आरएमसी प्रकल्पाना ठामपाने वितरीत कराव्यात व त्याचे तंतोतंत पालन करण्याबाबत आदेश निर्गमित करण्याच्या सूचना महाराष्ट्र प्रदुषण नियंत्रण मंडळाचे अध्यक्ष सिध्देश कदम यांनी दिल्या.
नवीन मलनिस्सारण वाहिनी टाकताना त्या सोबतच प्रक्रिया केलेल्या पाण्याचा पुनर्वापर करण्यासाठी आवश्यक असणारी मलवाहिनी टाकून घ्यावी. प्रक्रिया केलेले सांडपाण्याचा मोठ्या प्रमाणात वापर होणे आवश्यक आहे. मलनि:सारण प्रक्रिया केंद्रातील मळाचा खत म्हणून वापर करावा. यामुळे ठाणे महानगरपालिकेला मोठ्या प्रमाणात महसुल प्राप्त होईल.
खाजगी मलनिस्सारण वाहिन्यांनी महाराष्ट्र प्रदुषण नियंत्रण मंडळाचे संमती घेणे बंधनकारक करावे. तसेच सदर मलनिस्सारण प्रकल्पा मधून प्रक्रिया केलेल्या पाण्याचा विनीयोग सदर खाजगी संकुलात शौचालये, उद्यान तसेच गाडी धुण्यासाठी वापरण्याचे बंधनकारक करण्यात यावे. तसेच ग्राऊंड वॉटर सर्व्हे करण्यात यावा.
एकल वापर प्लॅस्टिक संदर्भात्‍ ठाणे महापालिका करीत असलेल्या कार्यवाहीचा आढावा महाराष्ट्र प्रदुषण नियंत्रण मंडळाचे अध्यक्ष सिध्देश कदम यांनी घेतला, एकल वापर प्लॅस्टिक संदर्भात मोठ्या प्रमाणात जनजागृती करणे आवश्यक आहे. शहरातील हॉटेल्स ज्या ठिकाणी पदार्थ देण्यासाठी प्लास्टिकचा वापर केला जात आहे, अशांसाठी ठाणे महापालिका स्वत:च्या स्तरावर कायदा करुन कडक कारवाई करु शकते असेही त्यांनी नमूद केले. एकल वापर प्लास्टिकबाबत रॅपिड ड्राईव्ह घेण्यात यावा अशा सूचना त्यांनी दिल्या. सिंगल युज प्लास्टिक बंदीसाठी ठाणे महानगरपालिकेने स्वतंत्र कक्ष स्थापून वेळोवेळी सिंगल युज प्लास्टिक जप्त करावे. त्याबाबत उपविधीमध्ये सुधारणा कराव्यात व शैक्षणिक संस्थांना सोबत घेवून मोठ्या प्रमाणात जनजागृती करावी.
घनकचरा व्यवस्थापनासाठी प्रत्यक्ष स्थळी वापरण्यात येणाऱ्या टोगो व्हॅन बाबत त्या अधिक प्रमाणात वापरण्यात याव्यात असे निर्देश दिले, त्यासाठी आवश्यक असल्यास ठामपाने महाराष्ट्र प्रदुषण नियंत्रण मंडळाकडे मागणी करावी असेही त्यांनी सांगितले. घनकचरा व्यवस्थापन ओला व सुका कचरा बाबत मोठया प्रमाणात वर्गीकरण होण्यासाठी जनजागृती करावी. स्वच्छता अभियानाच्या माध्यमातून रस्ते स्वच्छ करण्याचे कार्यवाही वेळोवेळी करावी. त्याबाबत आवश्यक असल्यास ठामपाने स्वच्छता मशीन बाबतची मागणी महाराष्ट्र प्रदुषण नियंत्रण मंडळाकडे नोंदवावी.
ठामपाने मोठ्या उद्यानांमध्ये आधुनिक मलनिस्सारण प्रक्रिया केंद्र स्थापित करावे व त्यामधून प्रक्रिया केलेले सांडपाणी तेथील वृक्ष लागवडीसाठी वापरावी. बांधकाम व्यावसायीकांना Low Cost Air Sensor उभारण्यास सक्ती करावी. तसेच कत्तलखानाच्या ठिकाणांवरून निघणाऱ्या वेस्टचे व्यवस्थित नियोजन करावे. तसेच हवा प्रदूषण नियंत्रणाबाबत उपाययोजना करण्याच्या सूचना महाराष्ट्र प्रदुषण नियंत्रण मंडळाचे अध्यक्ष सिध्देश कदम यांनी बैठकीत दिल्या.
